حواديت

ياما فـ زماننا قلوب
رسماها أعمارنا
زى النجوم حواديت
على ضل شباكنا

دى مركبى فضة
وفرحى لو قضَّى
حبيبتى تبقى معايا
من غيرها مش هرضَى

ساعات أتوه مرّات
ألقى القمر هدى
يسقى النسيم شربات
فى ليل طويل عدّى

الصعب راح ولا
الحب ده أحلى
لو وقفت الساعات
صوتى أكيد اعلى

لو زارنى فرحى ساعات
حواديتى ما بتخلص
قمرى حصان فى الليل
ونجومه دى بترقص

والحلم ويايا
والذكرى جوايا
من بين كتير حكايات
حكايتنا دى حكاية

ساعات أحب حاجات
ما يحبهاش غيرى
فى الرايحة فى الجايات
اغنى مع طيرى

طمنى اتطمن
فى القلب راح أسكن
وطول هواكى معاى
اتدفـّى واتطمن

لـ مجدى نجيب

عدسة : مصطفى نوبى

لو غصب عنك بان عليك .. هيصدّقوا ؟

فكرة " وجودك بعد موتك "

بتخلي قلبك يتقبض

و تحاول انك تفتكر

أبعد حاجات فـِ الذاكرة

، تـُعصُر خيالك

متلاقيش

غير صِفر بالبُنط العريض

، طب لو هتبدأ من جديد

ضامن تعيش ؟!

من قصيدة ( سنة 20 )

خدى الجاكت يا حبيبتى

قطعة الصلصال التى أعطتنى إياها معلمة الرسم
صنعت منها على هيئتك،
و لما نفخت فيها من روحى .. بُهت الحاضرون.

من قصة ( دفتر غياب )

تدعوكم جماعة ابدأ الأدبية
لـ حضور مناقشة
المجموعة القصصية " أشجار أفزعها البرق "
للقاصة دعاء عبده
و حوار نقدى مع الروائية د. سحر الموجى
و الروائى د. بهاء عبد المجيد
يجريه القاص محمود منسى

السبت 30 أغسطس 7 مساء - مكتبة البلد

ديوانى الأولانى

" أنا بهديلـِك نجاحى ده .. لأنـِّك أكتر حد عانى من فشلى"

woooooow
I feel good

أنا كسبت فـ مسابقة ( ورقة و قلم )
فـ مجال شعر العامية
عن ديوانى الأول " نص عمر "
و انشاء الله الديوان يعجبكم و يكون قد ثقتكم فيا


الحمد لله .. قد ايه كنت محتاج نجاح فـ الوقت ده

بين رموشك .. نسـّمينى

- جفنِك شقي -

متغمضيش

فـ جبيني نور

لو تلمحيه

نوصل

لو تلمحيه ..

ياللي فـ عنيكي المغرية

عطش المطر

للفرح بيه...

من قصيدة " و العرش "

لكن ابدا ً الشعر لم يغب ..

قد يغيب الشعراء

لكن أبدا ً الشعر لم يغب
طالما كست الشمس مزق السحب
بالنار و الذهب
طالما حمل الهواء عطرا ً فى أعطافه وانسجم
طالما الربيع لم يغب
طالما ظل نبع الحياة
و فى البحر و السماء هوة للرصد لم تستجب
طالما يسير الإنسان لا يعرف إلى أين السير
طالما كان هناك لغز
طالما ضحكت الروح
طالما ضحكت الشفاه
طالما بكت العين دون دموع
طالما بقت الآمال و الذكريات
طالما كانت هناك عيون
تترائى فيها العيون ناظرة
طالما الشفاه
للشفاه هامسة .. تستجب
طالما ظل فى الكون حسن امرأة
فـ الشعر لم يغب ..

جوستافو أدولفو بيكير

إلى من علمتنى حبا ً .. فـ صرت لها قلبا ً

الزحمة ..

مابتلقاش سبيل

علشان تشوف

منك دموع ...

لو تفركك ..

بتنـَدِّي أحلام

، ذكريات

أو كلمة حلوة

عن بنت

بتحبك أوي ..

من قصيدة ( سنة 20 )

حمد الله ع السلامة يا خال ..

يا وردة يا زارعة فـ قلبى الشكوك
عبير الحبايب ساعات كله شوك ..

عبد الرحمن الأبنودى

فلسفة صورة .. ليس إلا ..

أخيرا ً ديوان " نص روح" .. مليون مبروك يا عبير ..

سيداتى .. آنساتى .. سادتى
نتشرف بدعوة سيادتكم لحضور الحدث الآتى ..

الزمان:
بكرة .. الجمعة 17 /4 /2008
الساعة 8 مساءً
المكان:
مكتبة عمر بوك ستور
فوق فلفلة اللى فـ طلعت حرب ستريت
الحدث بقى:
صدور ديوان " نص روح"
للشاعرة السمراء
(عبير الراوى)

ما بين دمى .. وبين روحى
ضلوعك اللى انا منها
بعوجة حوا من يومها
و لعنة شجرة التفاح !

الله يا عبير

الدعوة عامة و على ضمانتى
انشالله يبقى يوم جميل

شهد العزلة

رأيتُ إرادةَ الفقراءِ
وَهْيَ تخوضُ حربَ الخبْزْ
وتنزِفُ
دونَ فلسفةٍ
ودونَ بلاغةٍ
أو عجْزْ
رأيتُ صلاةَ دمعتِهِمْ
فكيفَ أرى
ولاَ أهتزّْ!!

أحمد بخيت

إلى أجملهن .. إلى حبيبتى

الدمعة ..
ساعات بتبـِلّ الريق

من قصيدة "تداعى لمعانى"

إلى نصفى الأول .. إليها

بس بقيت الفصل قالولى

-وعنيهم بتدمع حبر-

:"إن البنت السمرا اياها

يوم ماتصلبت ع السبورة

خبت إنك أول واحد

فتش فيها عن المجهول"

من قصيدة "فشنك"

أشجار أفزعها البرق

صدرت مؤخرا عن دار مزيد
"أشجار أفزعها البرق" مجموعة قصصية
للكاتبة السمراء/ دعاء عبده




و انشالله حفل التوقيع
6 مساء الأحد 3 فبراير
مكتبة ديوان بالزمالك

للبنت السمرا اللى بتعرف تتنفسنى .. و تخبينى فيها من البرد

أنا المنقوش على صِدرك
و من ريقك بيتوضى سمارى
و دنيتى بتكمل
عشان قلبى مهوش ملكى
عشانك بس .. باتجَمِّل

"مقطع من قصيدة "وشم