بين انتهائك وارتعاش الصمت ف عيونهم

نُص عُمر

ولاعتك فاضية
وسجايرك فَرط
بتحاول تِهرَب برّه ملامحك
عُمرك ما قدِرت
البرد ف قلبك
و جيوبك رافضة انك تدفن
جواها اديك
قُدَّامك الف طريق لِهْناك
والليل ف عنيك
بيدارى ملامح ناس
اختاروا يكونوا معاك
خايف..
وبتصرخ
بتدوَّر على حد يكون سامع
بتنادى عليها
وزعيقَك واصل آخر الشارع
مشتاق للضحكة المولودة
من بين شفايفها
(أيام ماهى كانت قدامك)
لسَّاك مِستَنّى
و بتسأل امتى هاترجعلك
الوقت اتأخر
الناس ملهية ف احلامها
و عمود النور
بيبص عليك انت لوحدك
بيخلى خيالك يتمرد
ويحوم حواليك
بتحاول تِسبَق
بيهدَّك تعبك
وتُقَع من طولك
(كالعادة)
تدَّارى ف رُكن..